Xiaomi સહિતના અન્ય ચીની સ્માર્ટફોન્સ ફેંકી દો, આ દેશની સરકારે પોતાના નાગરિકોને આપી સલાહ

- યુરોપમાં શાઓમીના ફ્લેગશિપ ફોન Mi 10T 5Gમાં સેન્સરશિપ કેપેબિલિટી મળી આવી 

નવી દિલ્હી, તા. 26 સપ્ટેમ્બર, 2021, રવિવાર

મેડ ઈન ચાઈના સ્માર્ટફોન્સને લઈ ફરી એક વખત ચર્ચા શરૂ થઈ છે. લિથુઆનિયાની સરકારે પોતાના નાગરિકોને ચીની સ્માર્ટફોન ફેંકી દેવા માટે કહ્યું છે. એટલું જ નહીં, સરકારે એમ પણ કહ્યું છે કે, ભવિષ્યમાં ચીની ફોન ન ખરીદશો. આ માટે સરકારે સ્માર્ટફોન બનાવતી બે કંપનીઓના નામ પણ હાઈલાઈટ કર્યા છે. સરકારે Xiaomi અને Huaweiના સ્માર્ટફોન્સ ફેંકી દેવા માટે કહ્યું છે. તે માટે ફોનની બિલ્ટ ઈન સેન્સરશિપને કારણ ગણાવી છે. તેનાથી કેટલીક ટર્મ્સ ફોનમાં બ્લોક કરી દેવામાં આવે છે. 

જ્યારે લિથુઆનિયા અને ચીન વચ્ચેના સંબંધો સારા નથી તેવા સમયે જ લિથુઆનિયા દ્વારા આ આરોપ લગાવવામાં આવ્યો છે. લિથુઆનિયા સંરક્ષણ મંત્રાલયના રાષ્ટ્રીય સાઈબર સુરક્ષા કેન્દ્રના નવા રિપોર્ટમાં ચીની સ્માર્ટફોન્સ પર આ આરોપ લગાવવામાં આવ્યો છે. 

રિપોર્ટ પ્રમાણે Xiaomi ફોન્સમાં 449 ટર્મ્સને સિસ્ટમ એપ ઓટોમેટિકલી સેન્સર્સ કરી દે છે. તેમાં ફ્રી તિબેટ, લોન્ગ લીવ તાઈવાન ઈન્ડિપેન્ડેન્સ, ડેમોક્રેસ મૂવમેન્ટ જેવા શબ્દો સામેલ છે. લિથુઆનિયા સાઈબર સિક્યોરિટીના અહેવાલ પ્રમાણે યુરોપમાં શાઓમીના ફ્લેગશિપ ફોન Mi 10T 5Gમાં સેન્સરશિપ કેપેબિલિટી મળી આવી હતી. 

એજન્સીના કહેવા પ્રમાણે તે યુરોપિયન યુનિયન રિજન માટે બંધ કરી દેવામાં આવ્યું પરંતુ તેને રિમોટલી કોઈ પણ સમયે ઓન કરી શકાય છે. સંરક્ષણ ઉપમંત્રીએ લોકોને વિનંતી કરી હતી કે, તેઓ નવા ચીની ફોન્સ ન ખરીદે અને બને તેટલી ઝડપથી જૂના ફોન દૂર કરે. 

જોકે Xiaomiના કહેવા પ્રમાણે તેમના ડિવાઈસમાં કોઈ પણ જાતના સેન્સરશિપ સોફ્ટવેર નથી લાગેલા. તેઓ યુઝર્સના લીગલ રાઈટ્સને રિસ્પેક્ટ અને પ્રોટેક્ટ કરે છે. તે સિવાય Huawei P40 5Gમાં પણ ખામી નોંધાઈ હતી પરંતુ તપાસમાં વનપ્લસ દોષી નહોતું આવ્યું.