ડ્રગ્સ કેસઃ જેલમાં 25 દિવસ વિતાવ્યા બાદ આજે આર્યન ખાનને મળશે મુક્તિ, 11:00 વાગ્યા સુધીમાં આવી શકે છે બહાર

- અગાઉ આર્યનને શુક્રવારે જ જેલમાંથી છોડવાની વાત થઈ રહી હતી પરંતુ બેલ ઓર્ડર અધિકારીઓ સુધી ન પહોંચ્યો

નવી દિલ્હી, તા. 30 ઓક્ટોબર, 2021, શનિવાર

અભિનેતા શાહરૂખ ખાનના દીકરા આર્યન ખાનને આજે જેલમાંથી મુક્તિ મળી શકે છે. સવારે 5:30 કલાકે જ આર્થર રોડ જેલનું બેલ બોક્સ ખોલી દેવામાં આવ્યું હતું. એવું કહેવાય છે કે, જલ્દી જ આર્યનને જેલમાંથી મુક્ત કરી દેવામાં આવશે. આર્યન ખાનની મુક્તિને લઈ તેના પરિવારજનોમાં આનંદ પ્રસર્યો છે. શુક્રવારથી જ શાહરૂખના ઘરમાં ઉત્સવનો માહોલ જોવા મળી રહ્યો છે. 

આર્થ રોડ જેલના અધિકારીઓને આર્યનની જામીનનો ઓર્ડર મળી ગયો છે અને આર્યનને મુક્ત કરવા માટેની પ્રક્રિયા ચાલી રહી છે. આર્યન ખાનને આ અંગે જણાવી દેવામાં આવ્યું છે. તે ખૂબ જ ખુશ છે અને જેલના એક સાથી સાથે વાતો કરી રહ્યો છે. જેલના અધિકારીઓના કહેવા પ્રમાણે તેમને અન્ય જામીન માટેના પણ ઓર્ડર મળ્યા છે. સૌ પર સાથે જ કામ થશે અને સૌને સાથે જ મુક્ત કરવામાં આવશે. અધિકારીઓના કહેવા પ્રમાણે આર્યનને સવારે 10:30 વાગ્યાથી 11:00 વાગ્યા સુધીમાં મુક્ત કરવામાં આવી શકે છે. 

આર્થર રોડ જેલમાંથી આર્યનને લેવા માટે શાહરૂખના ઘરેથી ગાડીઓનો કાફલો નીકળી ચુક્યો છે. 3 એસયુવી શાહરૂખના ઘર મન્નતથી રવાના થઈ છે. આર્યનની ઘરવાપસી માટે ચાહકો પણ રાહ જોઈ રહ્યા છે અને અનેક જગ્યાએ આર્યનના સપોર્ટમાં બેનર્સ લઈને ઉભા રહ્યા છે. 

અગાઉ આર્યનને શુક્રવારે જ જેલમાંથી છોડવાની વાત થઈ રહી હતી પરંતુ બેલ ઓર્ડર અધિકારીઓ સુધી ન પહોંચ્યો માટે આર્યને એક રાત જેલમાં જ વિતાવવી પડી.