સમગ્ર યુક્રેનમાં વાગી જોખમ દર્શાવતી સાયરન, રશિયન સેનાએ રોકી રેસ્ક્યુ બસ

- દેશ આગામી પેઢીઓ સુધી યુદ્ધના પરિણામો ભોગવશેઃ ઝેલેન્સ્કી

કીવ, તા. 20 માર્ચ 2022, રવિવાર

રશિયા અને યુક્રેન વચ્ચે છેલ્લા 25 દિવસથી ભીષણ યુદ્ધ ચાલી રહ્યું છે. આજે સમગ્ર યુક્રેનમાં રશિયા દ્વારા એરસ્ટ્રાઈક કરવામાં આવે તેવી શક્યતા છે. આ કારણે યુક્રેનની સરકારે દેશભરમાં એરસ્ટ્રાઈકને લઈ એલર્ટ જાહેર કર્યું છે. યુદ્ધ વચ્ચે રશિયાએ યુક્રેનના મારિયુપોલ ખાતે રેસ્ક્યુ ઓપરેશનમાં સામેલ બસોને રોકી દીધી છે. 

યુક્રેનના શહેરો પર રશિયા દ્વારા સતત ઘાતક હુમલાઓ થઈ રહ્યા છે. જાણવા મળ્યા મુજબ રશિયાએ યુક્રેન પર પોતાની નવી હાઈપરસોનિક મિસાઈલ (Hypersonic Missile) વડે હુમલો કર્યો છે. આ તરફ યુક્રેનના રાષ્ટ્રપતિ વલોડિમિર ઝેલેન્સ્કીએ રશિયાને ગંભીર ચેતવણી આપતા કહ્યું હતું કે, દેશ આગામી પેઢીઓ સુધી યુદ્ધના પરિણામો ભોગવશે. 

બ્રિટન સરકારના એક શીર્ષ અધિકારીએ એવી આશંકા વ્યક્ત કરી છે કે, એક તરફ મોસ્કો ખાતે શાંતિ વાર્તા ચાલી રહી હતી અને બીજી તરફ રશિયાએ યુક્રેનમાં સૈન્ય હુમલાઓ તેજ કરી દીધા. 

એરસ્ટ્રાઈકનું એલર્ટ

યુક્રેનના મોટા ભાગના શહેરોમાં રશિયન હુમલાનું એલર્ટ આપવામાં આવ્યું છે. યુક્રેનની સરકારે સુમી, માઈકોલાઈવ, ટેરનોપિલ, પોલ્ટાવા, કિરોવોહ્રદ, ખારકીવ, જાપોરિજ્જિયા, કીવ, લવીવ, ઈવાનો-ફ્રૈંકિવ્સ્ક, નિપ્રોપેટ્રોવ્સ્ક, રિવ્ને, વોલિન, ચર્કાસી, જોઈટોમિર, વિન્નિત્સિયા, ઓડેસા અને ઓબ્લાસ્ટમાં હવાઈ હુમલાનું એલર્ટ આપીને સાયરન વગાડી છે.