મોદી આજથી છઠ્ઠી વખત ફ્રાંસની મુલાકાતે , રફાલ જેટ ડીલની શક્યતા
- મોદી ફ્રાંસના બેસ્ટિલ ડે પરેડના મુખ્ય મહેમાન બનશે
- ફ્રાંસના રાષ્ટ્રપતિ સાથે મોદી ડિનર લેશે, સંગ્રહાલય અને પ્રખ્યાત એફિલ ટાવરના નજારાનો પણ આનંદ માણશે
- સ્કોર્પિયન સબમરિન ખરીદવા અંગે વાતચીતની શક્યતાઓ, 15મીએ ફ્રાંસથી મોદી અબુ ધાબી રવાના થશે
નવી દિલ્હી : વડાપ્રધાન નરેન્દ્ર મોદી ૧૩થી ૧૪મી જુલાઇના રોજ ફ્રાંસની મુલાકાત લેવાના છે. વડાપ્રધાન મોદી છઠ્ઠી વખત ફ્રાંસની મુલાકાતે જવાના છે. ૧૪મી જુલાઇએ યોજાનારા ફ્રાંસના રાષ્ટ્રીય દિવસ બેસ્ટિલ ડે પરેડ સમારોહમાં વડાપ્રધાન મોદી મુખ્ય અતિથિ તરીકે હાજર રહેશે. બે દિવસીય પ્રવાસ દરમિયાન મોદી ફ્રાંસના રાષ્ટ્રપતિની પણ મુલાકાત લેશે, દરમિયાન રફાલ જેટ અંગે જાહેર કરવામાં આવી શકે છે.
બે દિવસીય પ્રવાસ દરમિયાન વડાપ્રધાન મોદી ૨૬ રફાલ સમુદ્રી લડાકુ જેટ (રફાલ એમ) અને ત્રણ સ્કોર્પિયન કેટેગરીની સબમરિન ખરીદવા માટે અબજો ડોલરની ડીલની પણ જાહેર કરી શકે છે. ફ્રાંસની આ મુલાકાત બાદ વડાપ્રધાન નરેન્દ્ર મોદી અબૂ ધાબી પણ જવાના છે. વડાપ્રધાન મોદી ૧૩મી તારીખે ફ્રાંસ પહોંચી જશે. જ્યારે ૧૩થી ૧૫મી તારીખ વચ્ચે તેઓ ફ્રાંસના વિવિધ કાર્યક્રમો અને મુલાકાતમાં ભાગ લેશે. ૧૩મી જુલાઇના પેરીસ પહોંચ્યા બાદ લા સીન મ્યૂઝિકલમાં ભારતીય પ્રવાસિઓને સંબોધીત કરશે.
કાર્યક્રમ બાદ ફ્રાંસના રાષ્ટ્રપતિ ઇમૈનુએલ મૈક્રોં એલિસી પેલેસમાં પોતાના સત્તાવાર નિવાસ સ્થાન પર વડાપ્રધાન નરેન્દ્ર મોદીની સાથે પ્રાઇવેટ ડિનર કરશે. આ દરમિયાન બન્ને દેશના વડાઓની વચ્ચે દ્વિપક્ષીય વાતચીત થશે. ૧૪મી જુલાઇના રોજ વડાપ્રધાન નરેન્દ્ર મોદી પેરિસમાં બેસ્ટિલ ડે પરેડમાં મુખ્ય અતિથિ તરીકે હાજર રહેશે. આ દરમિયાન બન્ને દેશના પ્રતિનિધિઓની વચ્ચે પણ વાતચીત થશે. મૈક્રોં લોવર સંગ્રહાલયના કૌર માર્લી પરિસરમાં વડાપ્રધાન નરેન્દ્ર મોદી માટે ડિનર હોસ્ટ કરશે. ફ્રાંસીસી રાષ્ટ્રપતિ પીએમ મોદીને પ્રસિદ્ધ સંગ્રહાલયની મુલાકાત પણ કરાવશે. જે બાદ મોદી અને ઇમૈનુએલ મૈક્રોં લોવર સંગ્રહાલયની છત પરથી એફિલ ટાવરના નજારાનો પણ આનંદ લેશે. વડાપ્રધાન મોદીની સાથે ભારતીય સીઇઓનું એક વેપારી પ્રતિનિધિમંડળ પણ સામેલ થશે.
Comments
Post a Comment