ગુજરાતમાં 5 નવા ચહેરા, 25 વર્તમાન સાંસદોનું પત્તુ કપાયું, ભાજપની બીજી યાદીથી શું મેસેજ મળ્યો

Loksabha Election 2024 | ભાજપ (BJP) એ બુધવારે આગામી લોકસભા ચૂંટણી માટે 72 ઉમેદવારોની બીજી યાદી જાહેર કરી દીધી. જેમાં 25 વર્તમાન સાંસદોની જગ્યાએ નવા ચહેરાઓને ટિકિટ આપવામાં આવી છે.

દિલ્હીમાં શું ફેરબદલ? 

દિલ્હીમાં ભાજપે પૂર્વ દિલ્હી લોકસભા સીટ પરથી હર્ષ મલ્હોત્રાને પોતાનો ઉમેદવાર બનાવ્યો છે. ગૌતમ ગંભીર હાલમાં આ સીટ પર સાંસદ છે. ઉત્તર પશ્ચિમ દિલ્હી (અનામત) બેઠક પરથી યોગેન્દ્ર ચંદોલિયાને ઉમેદવાર બનાવવામાં આવ્યા છે. આ બેઠક પર વર્તમાન સાંસદ હંસરાજ હંસની ટિકિટ રદ કરવામાં આવી હતી.

ગુજરાતમાં પાંચ નવા ચહેરાઓને ટિકિટ

વડાપ્રધાન નરેન્દ્ર મોદી અને ગૃહમંત્રી અમિત શાહના ગૃહ રાજ્ય ગુજરાતમાં ભાજપે પાંચ વર્તમાન સાંસદોની જગ્યાએ નવા ચહેરાઓને ટિકિટ આપી છે. ભાજપે તેના બે વખત સાંસદ દીપસિંહ મગનસિંહ રાઠોડની જગ્યાએ સાબરકાંઠા બેઠક પરથી ભીખાજી દુધાજી ઠાકોરને મેદાનમાં ઉતાર્યા છે. પાર્ટીએ ભાવનગર બેઠક પરથી નિમુબેન બાંભણિયાને ઉમેદવાર બનાવ્યા છે. જ્યારે આ બેઠક પરથી બે વખતના સાંસદ ભારતીબેન ધીરૂભાઈ શિયાળની ટિકિટ રદ્દ થઈ છે. છોટા ઉદેપુર લોકસભા બેઠક પરથી ભાજપે વર્તમાન સાંસદ ગીતાબેન વજેસિંગભાઈ રાઠવાને બદલે જશુભાઈ ભીલુભાઈ રાઠવાને મેદાનમાં ઉતાર્યા છે. પાર્ટીએ સુરત બેઠક પરથી મુકેશભાઈ ચંદ્રકાંતને પોતાના ઉમેદવાર બનાવ્યા છે. જ્યારે ત્રણ વખત સાંસદ અને કેન્દ્રીય મંત્રી દર્શના વિક્રમ જરદોશની ટિકિટ રદ્દ કરવામાં આવી છે.

હરિયાણામાં પણ નવું સમીકરણ

હરિયાણામાં ભાજપે અશોક તંવરને સિરસા બેઠક પરથી તેના વર્તમાન સાંસદ સુનીતા દુગ્ગલના સ્થાને ઉમેદવાર બનાવ્યા છે. કોંગ્રેસના ભૂતપૂર્વ નેતા તંવર તાજેતરમાં આમ આદમી પાર્ટી (AAP) છોડીને ભાજપમાં જોડાયા હતા. કરનાલ સીટ પરથી પૂર્વ મુખ્યમંત્રી મનોહર લાલ ખટ્ટરને ઉમેદવાર બનાવવામાં આવ્યા છે. જ્યારે વર્તમાન સાંસદ સંજય ભાટિયાની ટિકિટ રદ કરવામાં આવી હતી. ખટ્ટરે આ અઠવાડિયે મુખ્યમંત્રી પદ પરથી રાજીનામું આપી દીધું હતું.

કર્ણાટકમાં પણ પાંચ નવા ચહેરા

પાર્ટીએ કર્ણાટકમાં બીજી યાદીમાં પાંચ નવા ચહેરાઓને પણ સામેલ કર્યા છે. કોપ્પલથી બસવરાજ ક્યાવતરને ઉમેદવાર બનાવવામાં આવ્યા છે, જ્યારે બે વખતના સાંસદ સંગન્ના અમરપ્પા કરાડીની ટિકિટ પડતી મૂકવામાં આવી છે. બી શ્રીરામુલુને વર્તમાન સાંસદ વાય દેવેન્દ્રપ્પાને બદલે બેલ્લારી (અનામત) બેઠક પરથી મેદાનમાં ઉતારવામાં આવ્યા છે. જ્યારે કર્ણાટકના પૂર્વ મુખ્યમંત્રી બસવરાજ બોમ્માઈને હાવેરીથી ઉમેદવાર બનાવવામાં આવ્યા છે. આ સાથે જ આ બેઠક પરથી ત્રણ વખત સાંસદ રહી ચૂકેલા શિવકુમાર નબાસપ્પા ઉદાસીની ટિકિટ રદ્દ કરવામાં આવી છે. જ્યારે દક્ષિણ કન્નડ બેઠક પરથી ભાજપે નલિન કુમાર કટીલને બદલે કેપ્ટન બ્રિજેશ ચૌટાને ઉમેદવાર બનાવ્યા છે. કટીલે આ બેઠક ત્રણ વખત સંભાળી હતી. પાર્ટીએ યદુવીર કૃષ્ણદત્ત ચમરાજા વાડિયાને મૈસૂર બેઠક પરથી ઉતાર્યા છે. જ્યારે બે વખતના સાંસદ પ્રતાપ સિંહાની ટિકિટ રદ કરવામાં આવી છે. ભાજપે છ વખતના સાંસદ શ્રીનિવાસ પ્રસાદની જગ્યાએ ચામરાજનગર સીટ પરથી એસ બલરાજને પોતાના ઉમેદવાર બનાવ્યા છે.

મધ્યપ્રદેશમાં પણ વર્તમાન સાંસદોની ટિકિટ કપાઈ

મધ્યપ્રદેશમાં ધાર સીટ પરથી છત્તર સિંહ દરબારની જગ્યાએ ભાજપે સાવિત્રી ઠાકુરને ટિકિટ આપી છે. જ્યારે વર્તમાન સાંસદ દલ સિંહ બિસેનની જગ્યાએ ભારતી પારધીને બાલાઘાટ બેઠક પરથી ઉમેદવાર બનાવવામાં આવ્યા છે.

મહારાષ્ટ્રમાં નાગપુરથી ફરી ગડકરી અને બીડથી પંકજા મુંડે

મહારાષ્ટ્રમાં ભાજપે પાંચ લોકસભા બેઠકો પર તેના વર્તમાન સાંસદોની જગ્યાએ નવા ચહેરાઓને ટિકિટ આપી છે. પાર્ટીએ સ્મિતા વાળાને જલગાંવથી પોતાના ઉમેદવાર બનાવ્યા છે. આ બેઠક પર વર્તમાન સાંસદ ઉન્મેષ ભૈયા સાહેબ પાટીલની ટિકિટ રદ કરવામાં આવી છે. ઉત્તર મુંબઈ બેઠક પરથી બે વખત ભાજપના સાંસદ રહી ચૂકેલા ચિન્નૈયા શેટ્ટીની જગ્યાએ કેન્દ્રીય મંત્રી પીયૂષ ગોયલને મેદાનમાં ઉતારવામાં આવ્યા છે. અકોલ બેઠક પરથી વર્તમાન સાંસદ સંજય શામરાવ ધોરતેની જગ્યાએ અનૂપ ધોરતેને ઉમેદવાર બનાવવામાં આવ્યા છે. પાર્ટીએ તેના વર્તમાન સાંસદ મનોજ કિશોરભાઈ કોટકના સ્થાને મુંબઈ ઉત્તર પૂર્વ બેઠક પરથી મિહિર કોટેચાને મેદાનમાં ઉતાર્યા છે. પંકજા મુંડેને તેમની બહેન પ્રીતમ ગોપીનાથ રાવ મુંડેના સ્થાને બીડ સીટથી ઉમેદવાર બનાવવામાં આવ્યા છે.

તેલંગાણામાં સાંસદ સોયમ બાબુ રાવની ટિકિટ કેન્સલ

તેલંગાણામાં ભાજપે ગોડમ નાગેશને આદિલાબાદ સીટ (અનામત) પરથી ઉતાર્યા છે. જ્યારે વર્તમાન સાંસદ સોયમ બાબુ રાવની ટિકિટ રદ કરવામાં આવી છે.

ઉત્તરાખંડમાં પરિવર્તનના સંકેત

ઉત્તરાખંડમાં ભાજપે પૂર્વ મુખ્યમંત્રી તીરથ સિંહ રાવતના સ્થાને ગઢવાલ બેઠક પરથી રાજ્યસભાના સભ્ય અનિલ બલુનીને મેદાનમાં ઉતાર્યા છે. પાર્ટીએ બે ટર્મ સાંસદ અને પૂર્વ કેન્દ્રીય મંત્રી રમેશ પોખરિયાલ નિશંકની જગ્યાએ પૂર્વ મુખ્યમંત્રી ત્રિવેન્દ્ર સિંહ રાવતને મેદાનમાં ઉતાર્યા છે.

ત્રિપુમાં મહારાણી કૃતિ સિંહ દેબબરમાને ટિકિટ મળી

ત્રિપુરામાં ભાજપે ત્રિપુરા પૂર્વ બેઠક પરથી રેબતી ત્રિપુરાની જગ્યાએ મહારાણી કૃતિ સિંહ દેબબરમાને ઉમેદવાર બનાવ્યા છે. અગાઉ, 2 માર્ચે, પાર્ટીએ 195 લોકસભા બેઠકો માટે ઉમેદવારોની પ્રથમ યાદી જાહેર કરી હતી. જેમાં 33 વર્તમાન સાંસદોની જગ્યાએ નવા ચહેરાઓને ટિકિટ આપવામાં આવી હતી.